He korero whakarapopoto
Te whakamahi a te Māori i te IT
Ahakoa he nui te Māori i tere hopu i te hangarau ipurangi (IT), he maha anō ngā take i pōturi te kapo ake a te iwi Māori whānui i te ipurangi i ērā atu iwi. Nō konei ka hua tētahi ‘wehenga matihiko’ i waenganui i te Māori me ērā atu iwi o Aotearoa.
Kua whakapau kaha ngā wānanga ki te tuku i ngā rorohiko hei whakamahi mā ngā Māori me te ako i te mātauranga hangarau.
Koinei anō te whakapau kaha a ētahi iwi.
Ko NZMIS te kaitaunaki matua a te Māori mō te ipurangi. Arā anō te pae tukutuku ko Nekeneke. Kei konei tētahi wāhi hei whakawhitiwhiti kōrero. I tīmatahia tēnei e Huarahi Tika Trust. I puea ake a Te Huarahi Tika i te hiahia o te Māori ki te whakamahi i ngā iarere o Aotearoa.
He marae mariko
Me he noho tawhiti te tangata mai i o rātou tūrangawaewae, ka taea tonu e rātou te hono atu ki ō rātou marae i runga i ngā whārangi ipurangi ā-iwi. He maha ngā pārongo, ngā hītori, ngā pārongo rēhita ā-iwi, ngā wāhi whakawhiti kōrero, ngā kōrero e pā ana ki ngā kokoraho Tiriti o Waitangi me ngā tohutohu reo Māori. He nui noa atu ngā whārangi ipurangi e tautoko ana i te reo Māori.
He hikaka te Māori ki te whakamahi i te ipurangi – he whārangi Bebo tō te Kīngi Māori.
He hononga ipurangi hohoro a KAREN e whakamahia ana e ngā whare wānanga, whare pukapuka, pūtahi rangahau, kura, whare taonga hoki o Aotearoa. Ka whakamahi ngā Māori i tēnei whārangi mō ngā whakawhitiwhiti whakaaro.
Mana whakairo ā-iwi
Kua whakamahia e iwi kē atu ngā pikitia me ngā kōrero a te Māori.
Te Reo Māori
Ka roa te wā kātahi ka wātea mai te tohutō ki runga i te ipurangi. I te tau 2009, ka wātea mai i runga i a Windows, Microsoft Office me Google. Ko ngā wāhitau tūranga tuarua ka kaha whakamahia ko te .maori.nz me te .iwi.nz. E whakamahaere ana a NZMIS ki te whakatakoto i te tūranga wāhitau teitei rawa: .aa.