Te maunga o Ruapehu

Te maunga o Ruapehu

He rerekē ngā tūmomo kōrero ā-iwi e pā ana ki te takenga mai o te awa o Whanganui. Heoi ka tīmata katoa ngā kōrero i ngā maunga o te puku o Te Ika-a-Māui. Tērā tētahi kōrero mō te wā e mate mōwai ana a Ruapehu, e whakaahuahia nei. Ka tangi a Ranginui ki a ia, ā, ka tau ngā roimata e rua ki ōna rekereke. Ko tētahi o ngā roimata nei ko te awa o Whanganui. Nāwai ka noho tonu te pōuri ki a Ruapehu ā, ka tonoa e Ranginui ngā hoa e whā mōna: ko Tongariro –hei kaitiaki mō ngā roimata – rātou ko Ngāuruhoe, ko Taranaki, ko te maunga ātaahua ko Pīhanga. Ka taumautia a Pīhanga hei wahine mā Tongariro, engari i hiahia kē a Pīhanga i a Taranaki. Whai muri atu i ngā tohutohu a Ruapehu ki a ia, ka wehe atu a Taranaki i te kāhui maunga. I whai atu a ia i te awa o Whanganui kia tae ki te moana. I reira ka pakaru atu a ia ki te tai hauāuru. Koinei te wāhi e anga atu ana tana titiro ki ōna hoa ō mua.